17. நன்றிக்கடன் - (சிறுகதை)
வெலிகம ரிம்ஸா முஹம்மத்
அன்றைய பத்திரிகையிலும் சுனிலின் கவிதையைக் கண்டு பிரமித்துப் போனான் கார்த்தி;. சுனிலின் கவிதைகள் அடிக்கடி பத்திரிகையில் வெளிவந்துகொண்டிருப்பதை கார்த்தி அவதானித்திருக்கிறான். அவனுடன் எப்படியாவது கதைத்து தனது பாராட்டுகளைத் தெரிவிக்க வேண்டும் என்று எண்ணினான் அவன்.
கார்த்தியும் அவ்வப்போது தான் எழுதிய கவிதைகளை பத்திரிகைகளுக்கு அனுப்புவது வழக்கம். அந்தக் கவிதைகள் பிரசுரமாவதைக் காணும் போது அவனுக்கு இனம் புரியாத ஒரு மகிழ்வு ஏற்படும். அத்துடன் அவன் பல மூத்த இலக்கியவாதிகளையும் அறிந்து வைத்திருந்தான். தனியார் நிறுவனத்தில் பணியாற்றிவரும் கார்த்தி, வானொலி நிகழ்ச்சியிலும் தனது பகுதிநேர பங்களிப்புக்களைச் செய்து வருகிறான்.
00000
பிறிதொருநாள் பத்திரிகை நிறுவனம் ஒன்றில் சுனில் தொழில் புரிவதாக அறியக் கிடைத்தது. அந்தப் பத்திரிகையில் கூட கார்த்தி ஏற்கனவே கவிதைகள் எழுதியிருக்கின்றான். எனவே அந்தப் பத்திரிகை நிறுவனத்தின் தொலைபேசி இலக்கத்தை தெரிந்து வைத்திருந்தான். அதனால் சுனிலுக்கு தொலைபேசி அழைப்பை மேற்கொண்டு தனது வாழ்த்துக்களைத் தெரிவித்தான்.
அதிலிருந்து கார்த்தியினதும் சுனிலினதும் இலக்கிய உறவு தொடர்ந்து சுமுகமாகப் போய்க்கொண்டிருந்தது. அவ்வப்போது கார்த்தியின் கவிதைகளை, சுனில் தனது பத்திரிகையில் தான் தயாரிக்கும் பக்கத்தில் பிரசுரித்தான். சுனில் பொறுப்பேற்றிருக்கும் பத்திரிகைப் பக்கத்தில் அவன் வாரா வாரம் எழுதும் பத்தி எழுத்துக்களுக்கான புத்தகங்கள், தகவல்களை கார்த்தி பெற்றுக்கொடுப்பான். அதனால் இருவருக்கிடையில் நட்பு ஏற்பட்டது.
சுனிலிடம் நிறைய எழுத்துத் திறமை இருந்தது. அவன் எழுதும் கவிதைகள் கார்த்தியைக் கவர்ந்தன. சுனில் பத்திரிகை நிறுவனத்தில் தொழில் செய்தபோதும் அவனுக்கு நிறைய இலக்கியவாதிகளுடன் தொடர்பிருக்கவில்லை. கார்த்தி ஏற்கனவே அவர்களுடன் தொடர்பாக இருந்ததால் சுனிலுக்கும் இலகுவாக அவர்களுடன் பழகி உரையாடும் சந்தர்ப்பம் கிட்டியது.
தலைநகரிலிருந்து வெளிவரும் பிரபலமான 'வானம்பாடி' சஞ்சிகையில் சுனிலைப் பற்றிய அறிமுகம் வெளிவருவதற்கு கார்த்தியே முழுக் காரணமாக இருந்தான். சுனிலின் தகவல்களை எடுத்துச் சென்று ஷவானம்பாடி| சஞ்சிகை ஆசிரியரிடம் நேரடியாகக் கையளித்து, அடுத்து வெளிவரும் சஞ்சிகையிலேயே அதனைப் பிரசுரித்து உதவுமாறு கார்த்தி கேட்டிருந்தான். அதுபோலவே சுனில் பற்றிய அறிமுகமும் அடுத்த மாதமே வெளிவந்திருந்தது.
சுனிலின் அறிமுகம் வெளிவந்த சஞ்சிகையின் சில பிரதிகளைக் குறிப்பிட்ட சில இடங்களுக்கு தபாலிடும்படி சுனில் கேட்டுக் கொண்டதற்கிணங்க, சுனிலுக்கு உதவும் முகமாக அந்த சஞ்சிகையின் பிரதிகள் சிலவற்றை தனது செலவிலேயே வாங்கிய கார்த்தி அவற்றை சுனில் கூறிய இடங்களுக்குத் தபாலில் அனுப்பி வைத்தான்.
அப்போது பத்திரிகைத் துறையை அறிந்து வைத்திருந்த சுனில், வானொலியிலோ தொலைக்காட்சியிலோ தான் பங்களிப்புக்களைச் செய்ய வேண்டும் என்ற தனது நீண்டகால ஆசையை கார்த்தியிடம் கூறினான். கார்த்திக்கு ஏற்கனவே வானொலியில் பரிச்சயம் இருந்ததால் ஷகவிதைவெளி| நிகழ்ச்சியின் தயாரிப்பாளரிடம், சுனிலின் திறமை பற்றி எடுத்துக்கூறி சுனிலுக்கு குரல் கொடுக்கும் சந்தர்ப்பங்களை வழங்குமாறும் கேட்டுக்கொண்டான். அதேநேரம் அந்த நிகழ்ச்சியின் பொறுப்பாளரிடமும் சுனிலின் திறமை பற்றிக் கூறி உடனடியாகவே சந்தர்ப்பத்தை அமைத்துக் கொடுத்தான். அதனால் சுனிலின் நீண்டநாள் ஆசை நிறைவேறியது. சுனிலின் வானொலிக் கனவு தன்னால் நிறைவேற்றப்பட்டதால் கார்த்தி அகம் மகிழ்ந்து போனான்.
"முதன்முதலா என்ன வானொலிக்கு அனுப்பினது நீங்கதான் கார்த்தி. நான் இதை என் வாழ்நாளில்; மறக்கவே மாட்டன். நான் கண்டிக்கு வந்த நாள்ள இருந்து பலரிடமும் கதைச்சிருக்கிறன். ஆனால் எனக்கு ஒருவரும் உதவி செய்ய இல்ல கார்த்தி. உங்களுடன் பழகிய கொஞ்ச காலத்திலயே வானொலிக்கு செல்லணும் என்ற எனது ஆசையை நிறைவேத்தித் தந்துட்டீங்க.." என்று சுனில் கூறினான்.
"அதுக்கென்ன சுனில்.. என்னால முடிஞ்ச ஒரு உதவிய நான் செஞ்சன். அவ்வளவுதான்.."
அத்துடன் சுனிலுக்குத் தேவையான புத்தகங்கள் சிலவற்றையும் கார்த்தி வாங்கிக்கொடுத்தான். மற்றும் இலக்கியக் கூட்டங்களுக்கும் அழைத்துச் சென்றான். மட்டுமல்லாமல் சில இலக்கிய நிறுவனங்களில் அங்கத்துவத்தையும் பெற்றுக் கொடுத்தான்.
வேறொரு நாளில் தனியார் வானொலி அலைவரிசையொன்றில் கவிதைப் போட்டிக்கான விண்ணப்பம் கோரப்பட்டிருந்தது. சுனிலும் அதில் கலந்துகொண்டு முதல் சுற்றில் தெரிவானான். அவ்வாறு தெரிவானவர்களை இந்தியாவுக்கு அழைத்துச்சென்று, கவிப்பேரரசு வைரமுத்து அவர்களின் முன்னிலையில் கவிதை எழுத வைக்கும் போட்டி ஒன்று நடைபெற ஏற்பாடாகி இருந்தது. சுனிலும் அதற்குத் தகுதி பெற்றிருந்தான். ஆனால் இந்தியாவுக்கு செல்வதற்கான பொருளாதார வசதிகள் அவனிடம் அப்போது இருக்கவில்லை. எனவே அவன் கார்த்தியிடம் ஒரு தொகைக் காசைக் கடனாகக் கேட்டான்.
"கார்த்தி இந்தியாவுல கவிதை எழுதுற போட்டிக்கு நானும் தெரிவாகி இருக்கிறன்.."
"அப்படியா.. என் வாழ்த்துக்கள் சுனில்! எனக்கு மிகவும் சந்தோசமா இருக்குது.."
"ஆனா.. அதில் ஒரு சின்ன சிக்கல்.. எனக்கு நீங்க ஒரு உதவி செய்ய முடியுமா..?"
"சொல்லுங்க சுனில் என்னால முடிஞ்சா கட்டாயம் நான் செய்வன்.."
"இதற்காகத் தேவைப்படும் காச கடனாகத் தந்தீங்க என்றால் பெரிய உதவியாயிருக்கும். மூன்று மாதங்களுக்குள் திருப்பித் தந்திடுவன்.."
"எப்படியாவது நான் ஏற்பாடு செய்றன். ஆனா முன்று மாசத்தில கட்டாயம் திருப்பித் தந்திடுங்க. ஆல் த பெஸ்ட்.."
சொன்னதுபோல கார்த்தி இரண்டு நாட்களுக்குள் சுனிலின் வங்கிக் கணக்கிலக்கத்துக்கு சுனில் கேட்ட தொகையை வைப்பு செய்துவிட்டு தொலைபேசியில் அறிவித்தான்.
00000
சுனில் இந்தியாவுக்குச் சென்று வந்துவிட்டான். அங்கே அவன் எடுத்திருந்த புகைப்படங்களை கார்த்திக்;கு பெருமையாகக் காட்டினான்.
சில நாட்களில் சுனில் பத்திரிகை நிறுவனத்திலிருந்து விலகி, தொலைக்காட்சி நிறுவனத்துக்கு இடம் மாறினான். கார்த்தியின் தங்குமிடத்துக்கு அருகாமையில்தான் சுனில் தொழில் புரியும் இடம் அமைந்திருந்தது. எனவே விடுமுறை தினங்களில் கார்த்தி தனது அலுவலக நண்பர்கள் இருவருடன் சென்று சுனிலுடன் பேசிவிட்டு வருவான்.
சுனில் காசைத் திருப்பித் தருவதாகச் சொன்ன மூன்று மாதங்களும் கடந்துவிட்டன. ஆனாலும் கார்த்தியிடம் எடுத்த காசை சுனில் திருப்பிக் கொடுக்கவில்லை. தாமதத்துக்கான காரணத்தைச் சொல்லவுமில்லை. அதைப்பற்றி கார்த்தியும் அப்போது ஒன்றும் கேட்கவில்லை.
இப்படியே மூன்று வருடங்களும் கழிந்தன. அப்போதும் சுனிலுக்கு எடுத்த காசைத் திருப்பிக் கொடுக்க வேண்டும் என்று தோன்றவில்லை.
ஒருநாள் கார்த்திக்கு திடீரென்று சுகயீனம் ஏற்பட்டதால் இரண்டு கிழமையாக தொழிலுக்குச் செல்லவில்லை. அதனால் பணத் தட்டுப்பாடு ஏற்பட்டது. எனவே சுனிலுக்கு தொலைபேசி அழைப்பை ஏற்படுத்தி, தான் ஏற்கனவே கொடுத்திருந்த காசை திருப்பிக் கேட்டான். ஆனால் அதுவரை தொலைபேசியிலும் நேரிலும் நன்றாகக் கதைத்துக்கொண்டிருந்த சுனில், கார்த்தி காசைத் திருப்பிக் கேட்டதும் தனது அலட்சியத்தை வெளிப்படுத்தினான். கார்த்தி தனது நிலைமையை எடுத்துக் கூறியும் சுனிலின் மனம் இளகவில்லை. தான் எடுத்த கடனைக் கொடுக்க வேண்டும் என்று எண்ணவுமில்லை.
"இப்ப என்னிடம் காசு இல்ல.."
"ஏன்ட நெலமயும் கஷ்டமா இரிக்கி. கொஞ்சம் கொஞ்சம் என்டாலும் தரப் பாருங்க..|| என்று சொல்வதற்குள் போனை வைத்துவிட்டான் சுனில்;. கார்த்திக்கு என்னவோ போலாகிவிட்டது. கொஞ்ச காலம் பொறுத்துக் கேட்கலாம் என்று பேசாமல் இருந்துவிட்டான். இன்னொரு இக்கட்டில் சுனிலுக்கு தொலைபேசினான்.
ஷஷஹலோ சுனில், நான் கார்த்தி பேசுறேன்.."
"என்ன?"
"அந்தக் காசு வேணும்.."
"இப்ப தர ஏலா.."
"என்ன சுனில் இப்படிச் சொல்றீங்க..?"
அழைப்பு துண்டிக்கப்பட்டது.
இப்போது கார்த்திக்கு கோபமும் ஆத்திரமும் ஏற்பட்டது. காசைக் கேட்;கும் போது கெஞ்சுவான்கள். இப்ப மிஞ்சுரான்கள், நன்றி கெட்டவன்கள் என்று அவனது உள்ளம் பொருமியது. சுனில் பணிவாக சொல்லாமல் அலட்சியப்படுத்தி பேசிய விதம் நீறுபூத்த நெருப்பு போல கார்த்தியின் மனதில் கனன்று கொண்டேயிருந்தது.
நான்கு மாதங்களாக கார்த்தி எதுவும் பேசவில்லை. அதன் பிறகு மீண்டும் ஒருநாள் மிகவும் கஷ்டமான ஒரு சூழ்நிலையை எதிர்கொண்ட சந்தர்ப்பமொன்றில் பலமுறை தொலைபேசியில் சுனிலை அழைத்தும் அந்த அழைப்புகளை அவன் எடுக்கவேயில்லை. இருந்தாலும் தொடர்ந்து முயற்சி செய்து கொண்டேயிருந்தான்.
ஏதோ நினைத்தவனாக கடைசியாக தனது அலுவலக நண்பர் ஒருவரின் தொலைபேசி இலக்கத்திலிருந்து சுனிலுக்கு கோல் பண்ணினான் கார்த்தி.
"ஹலோ சுனில். எனக்கு இன்னும் ஒரு கிழமைக்குள் காசு வேணும். எப்படிச்சரி தரப்பாருங்க.." என்று தனது கோபத்தை காட்டிக்கொள்ளாமல் கேட்டான் கார்த்தி.
"என்னால முடியாது. ஏலும்டா நீங்க எடுத்துக் காட்டுங்க.." என்று சவாலாகச் சொன்னான் சுனில்.
எந்தப் புற்றில் எந்தப் பாம்பு இருக்கும் என்பதை கார்த்தி அப்போதுதான் புரிந்துகொண்டான். சுனில் அவ்வாறு பேசியமை மனதில் வலியேற்படுத்தியதோடு எப்படியேனும் காசை எடுத்துக் காட்டுவேன் என்ற வைராக்கியத்தையும் ஏற்படுத்தியது.
நல்ல நட்பு என்பது வெறும் பணத்தால் வருவதல்ல. நல்ல குணத்தால் வர வேண்டியது. பரஸ்பர பண உதவியால் வலுப் பெறும் நல்ல நட்புக்கள் இருக்கின்றன. அதேபோல பணத்தை எடுத்துக்கொண்டு ஏமாற்றும் தீய நட்புக்களும் இருக்கின்றன என்பதை கார்த்தி நன்கு உணர்ந்துகொண்டான்.
கடனைப் பெற்றுக்கொண்டால் குறித்த தினத்தில் அதைத் திருப்பிக் கொடுக்கத் தெரிந்திருக்க வேண்டும். அதைவிடுத்து கொடுத்த கடனைத் திருப்பிக் கேட்டால், கடன் கொடுத்தவரை அதட்டுவது நியாயமில்லை. கடனைச் செலுத்த கால அவகாசம் தேவை என்றால் அதைப் பணிவாகக் கேட்டிருக்க வேண்டும். மாறாக ஷமுடிந்தால் எடுத்துக் காட்டு| என்று சவாலாகச் சொல்வது நல்ல மனிதனுக்குரிய அடையாளமல்ல.
இதுவரை பழகிய நட்புக்கே களங்கம் ஏற்படுத்திவிட்ட சுனிலைத் தனது முன்னைய நண்பன் என்று சொல்வதற்கே அருகதை இல்லாமல் போய்விட்டதை எண்ணி கார்த்தி மிகவும் வெட்கப்பட்டான். அத்துடன் சுனில்; அலட்சியமாகச் சொன்னதற்கிணங்க அதற்குரிய இடத்துக்குச் சென்று முறையிட்டுத்தான் கார்த்தி கொடுத்த கடனைப் பெற்றுக் கொண்டான்.
இந்த சம்பவத்துக்குப் பின்னர் கார்த்திக்கும் சுனிலுக்கும் இடையில் எந்தவிதமான தொடர்புகளும் இருக்கவில்லை.
அதன் பின்னரான காலங்களில் கார்த்தி இலக்கியத் துறையில் ஈடுபட்டு பல புத்தகங்களையும் வெளியிட்டான். பலரது பாராட்டுக்களும் அவனை வந்தடைந்தன.
பல பத்திரிகை, வானொலி, தொலைக்காட்சி நிறுவனங்கள் கார்த்தியை நேர்காணல் செய்தன. கார்த்தியோடு இதுவரை நல்ல நட்பைப் பேணி வருபவர்கள் அவனது முயற்சிகள் மற்றும் முன்னேற்றம் குறித்து மிகவும் மகிழ்ச்சியடைந்தார்கள்.
சுனில் தொழில்புரியும் 'சரிகமப' தொலைக்காட்சி நிறுவனத்திலிருந்தும் நேர்காணல் நிகழ்ச்சிக்காக கார்த்தியை அழைத்திருந்தார்கள். ஆனால் நேர்காணல் நிகழ்ச்சிக்கு கார்த்தி வரப்போகும் தகவலை அறிந்த சுனில், அந்தச் சந்தர்ப்பத்தை தனது தலையீட்டினால் தட்டிவிட்டான்.
கடன் கொடுத்து உதவினால் அதற்குக் கிடைக்கும் நன்றிக்கடன் இதுதான் என்பதை காலம் நன்றாக உணர்த்தியது!
வெலிகம ரிம்ஸா முஹம்மத்
No comments:
Post a Comment